Musiqili Komediya Teatrının binasının yenidən qurulması üçün 2 milyon manat ayrıldı

Prezident Administrasiyasının mətbuat xidmətindən Lent.az-a verilən məlumata görə, sərəncamda Azərbaycan Dövlət Musiqili Komediya Teatrının yarandığı vaxtdan etibarən sənət tariximizdə milli-mənəvi sərvətin bir çox qiymətli nümunələrini bəxş etdiyi qeyd olunur.

Teatr ölkəmizin zəngin ənənələrə malik qabaqcıl sənət ocaqlarından birinə çevrilərək bu gün də tamaşaçıların dərin rəğbətini qazanmaqdadır. Azərbaycan Respublikasının prezidenti xalqımızın mədəni həyatında özünəməxsus yerini və yüksək ictimai-əxlaqi dəyərlərin təbliğində rolunu nəzərə alaraq Azərbaycan Dövlət Musiqili Komediya Teatrının binasının yenidən qurulmasını təmin etmək məqsədilə qərara alıb ki, Azərbaycan Dövlət Musiqili Komediya Teatrının binasının yenidən qurulması ilə bağlı işlərin başlanılması üçün Azərbaycan Respublikasının 2010-cu il dövlət büdcəsində nəzərdə tutulan Azərbaycan Respublikası Prezidentinin Ehtiyat Fondundan Mədəniyyət və Turizm Nazirliyinə 2 milyon manat məbləğində vəsait ayrılsın.

Maliyyə Nazirliyi bu vəsaitin maliyyələşdirilməsini müəyyən olunan qaydada həyata keçirmək tapşırılıb.