Güldən Qaraböcək: “Niyə Azərbaycana çağırmadınız məni?” - MÜSAHIBƏ

Lent.az-ın məlumatına görə, müğənni Heydər Əliyev adına Beynəlxalq Hava Limanında jurnalistlərin suallarını cavablandırıb.

- Güldən xanım, bu sizin sənət həyatınız boyu Bakıya ilk yaradıcılıq səfərinizdir.

- Dəvət almadım. Niyə Azərbaycana çağırmadınız məni?

- Saatlarla sizi Hava Limanında gözlədik. Niyə bu qədər gecikdiniz, problem yaşamadınız ki?

- Yox, mən vaxtında gəldim. Burda çemodanları gözləməli oldum. Çemodanlarım itmişdi, nədənsə hər şey bir-birinə qarışmışdı.

- Sizin bura ailəliklə gələcəyiniz deyildi.

- Yox. Tək gələcəkdim, düşünürəm ki, sizə səhv informasiya veriblər.

- Sizi Türkiyə televiziya kanallarında az-az görürük, bunun səbəbi nədir?

- Bir dəyişiklik olsun istəyirəm. Yenilik olmadan efirdə görünməyin tərəfdarı deyiləm. Gözəl bir albom hazırlayıram.

- Sizin repertuarınızda Azərbaycan mahnıları da var. Bu ölkə xaricində tanınmaq üçün dəyişik proqramdır, yoxsa burda sevildiyinizdən xəbərdar idiniz?

- Bolqarıstanda, Gürcüstanda, Türkmənistanda sevildiyimdən xəbərdar idim. İnanın burda sevildiyimi bilmirdim. Sabah axşam bu sevginin şahidi olacağam. Sabah “Arzu qızım”, “Sən gəlməz oldun” mahnılarını ifamda eşidəcəksiniz .

- 80-ci illərdə Niyaməddin Musayevin mahnılarını oxumusunuz, hazırda əməkdaşlığınız varmı, bura gələndə görüş planlaşdırmısınızmı?

- Yox. Olmayıb. Əlbəttə görüşmək istəyərəm, niyə də olmasın?

- Bakıda neçə gün qalacaqsınız?

- Üç gün qalmağı planlaşdırmışam. Hazırda Heydər Əliyevin məzarını ziyarət etməyə yollanıram.

Lalə Yusifqızı