ABŞ-da Türk Mədəniyyət və İncəsənət Festivalı keçirilib

Avqustun 25-26-da ABŞ-ın Kaliforniya ştatının Monterrey şəhərində Türk Mədəniyyət və İncəsənət Festivalı keçirilib. Lent.az-ın Mədəniyyət və Turizm Nazirliyinin rəsmi saytına istinadən verdiyi məlumata görə, festivalda Azərbaycan yüksək səviyyədə təmsil olunub.

Ölkəmizin Los-Ancelesdəki baş konsulluğunun dəstəyi ilə quraşdırılmış stenddə Azərbaycana dair müxtəlif məlumat kitabçaları, turist xəritələri, suvenirlər və kiçik xalçalar təqdim edilib, mahir kamança ifaçısı İmamyar Həsənovun təqdim etdiyi Azərbaycan musiqi nümunələri tamaşaçılar tərəfindən böyük rəğbətlə qarşılanıb.

Üç il Azərbaycanda yaşayıb, hazırda Monterreydə təhsil alan amerikalı tələbə Mayka Land çıxış edərək Azərbaycanın nailiyyətləri, zəngin tarixi və mədəniyyəti, azərbaycanlıların yüksək qonaqpərvərlik və tolerantlıq ənənələri barədə iştirakçılara ətraflı məlumat verib.

Azərbaycanın stendində qonaqlara ölkəmizdən idxal edilən və Kaliforniyanın yüzlərlə dükanında satışı uğurla həyata keçirilən nar şirəsi təqdim edilmiş və şirə festival iştirakçıları tərəfindən çox bəyənilib.

Jalə