«Mən inkarın yox, təqdirin tərəfdarıyam»

Gənclər və İdman Nazirliyi, Ekologiya və Təbii Sərvətlər Nazirliyi, Mədəniyyət və Turizm Nazirliyinin birgə layihəsi olan Ekologiya mövzusuna həsr olunmuş «Gənclərin II Ümumrespublika Teatr Festivalı"na ssenari qəbulu davam edir. Lent.az-ın məlumatına görə, ssenarilər pyes formasında və Azərbaycan dilində olmalıdır.

Gənc rejissor Elxan Cəfərov festivalla bağlı bildirib ki, gənclərlə bağlı istənilən layihəni dəstəkləyir: “Bu festivalın təşkilatçılarına minnətdarlığımı ifadə edirəm. Gənclərin teatr festivalına münasibətim çox yüksəkdir, çox müsbətdir. Mən özüm də yaradıcı insanam və hər bir yaradıcılıq işinə böyük əhəmiyyət verirəm. İnsan əgər yaradıcıdırsa, və yaradıcılıqla məşğul olursa, o artıq qəhrəmandır. Özünü yaradıcılığa bağlayan və həsr edən insanlar mənim aləmimdə qəhrəman insanlardır. Bunu tam səmimiyyətlə deyirəm. Yaradıcı insanlar fədakar insanlardır və hər kəs ki, yaradıcılıqla məşğul olur, demək o müəyyən mənada özünü bu cəmiyyətə fəda etməlidir”.

Bu il festivala ekologiya mövzusunda ssenarilər təqdim olunacaq. E.Cəfərov bildirir ki, vətənpərvərlik mövzusu üçün hər zaman aktual və vacibdir. Bu mövzuya müraciət etmək həm də vətəndaş kimi borcumuzdur: “Ekologiya mövzusu da günümüzlə səsləşən və aktuallığı ilə seçilən mövzudur. Bir də sizə bir söz deyim; ümumiyyətlə, istənilən bir festival, yaxud, layihə cəmiyyətin inkişafı üçün hər hansı bir aktual mövzuya həsr olunursa, bunu yalnız alqışlamaq lazımdır. Mən bir rejissor olaraq inkarın tərəfdarı deyiləm, təqdirin tərəfdarıyam. Bunu birmənalı şəkildə deyirəm”.

Qeyd edək ki, layihənin ideya müəllifi, millət vəkili Jalə Əliyeva, icraçı direktoru Ramil Ağasıyevdir. Festivala ssenarilər avqust ayının 12-ə qədər [email protected] ünvanında qəbul olunur. Əlavə məlumat üçün isə (012)562 3639 və (070) 399 3639 nömrəli telefonlarla əlaqə saxlaya bilərsiniz.

Layihənin informasiya dəstəyi LENT.AZ və Guney.az xəbər portalLarı və Araz FM radiosudur.