Oksigen məhdudiyyəti bu canlının ömrünü artırır

Oksigenin məhdudlaşdırılması siçanların ömrünü 50 faiz artırıb.

Lent.az-ın məlumatına görə, Bostondakı Massachusetts General Hospitalının amerikalı alimləri müəyyən ediblər ki, oksigen qəbulunun məhdudlaşdırılması siçanların ömrünü 50 faizə qədər çoxaldır.

Digər məməli heyvanlara nisbətən daha sürətli qocalması üçün genləri dəyişdirilmiş siçanlar üzərində təcrübələr aparılıb.

Bu zaman atmosfer oksigeninin miqdarı tənzimlənib.

Sınaq subyektlərinin bəziləri normal oksigen səviyyələri ilə nəfəs alıblar (21 faiz), digərləri dörd həftəlik yaşlarında daha az oksigen olan bir mühitə köçürülüblər (11 faiz - 5000 metr yüksəklikdə qeydə alınan eyni səviyyə). Sonra hər iki qrup müqayisə edilib.

Onlar müəyyən ediblər ki, ikinci qrupdakı siçanlar normal oksigen səviyyəsinə malik birinci qrupdakı siçanlardan təxminən 50 faiz daha uzun yaşayır (orta ömür müddəti 15,7 həftə ilə müqayisədə 23,6 həftədir). Bundan əlavə, bu cür subyektlər nevroloji qocalıq proseslərində bir yavaşlama göstərib.

Tədqiqatçıların fikrincə, onların kəşfi məməlilərdə oksigen məhdudiyyətinin yaşlanma əleyhinə potensialını sübut edir.

Oxşar nəticələrin insanlar üçün də yaxşı nəticələr verəcəyi ehtimal olunur. Bunu yoxlamaq üçün, xüsusilə metodun və onun molekulyar mexanizmlərinin dəqiq faydalarını müəyyən etmək üçün əlavə sınaqlar planlaşdırılır.