Niyə bəzi insanlar hipnoza daha çox həssasdırlar? - CAVAB

Hipnoz sahəsində aparılan yeni tədqiqatlar maraqlı bir nəticəyə gətirib çıxarıb. Hipnoza daha çox həssas olan insanları birləşdirən müəyyən neyrofizioloji xüsusiyyət var. Təcrübəni aparan alimlər hipnotik induksiyadan əvvəl və sonra 40 könüllünün sinir fəaliyyətini öyrənmək üçün elektroensefaloqrafiyadan (EEQ) istifadə ediblər.

Lent.az xarici KİV-ə istinadən xəbər verir ki, nəticədə hipnotik təsirdən əvvəl sinir fəaliyyətinin aperiodik göstəricisindəki fərqlərin təbiətinin insanın hipnoza həssaslıq səviyyəsi ilə əlaqəli olduğu aşkar edilib.

Müntəzəm fasilələrlə təkrarlanmayan aperiodik siqnallardakı bu fərqlər zehni udma, rahatlama hissləri və hipnotik reaksiyaya hazırlığa təsir göstərə bilər.

"Nəticələrimiz təsdiq edir ki, hipnotik təcrübə çoxqatlı sinir əsasına malikdir", - tədqiqatçılar qeyd edirlər. Onlar vurğulayırlar ki, hipnotik hadisələrin müxtəlifliyinə baxmayaraq, hipnoza meylli insanları fərqləndirən beyin fəaliyyətinin ümumi elementi var.

Bu tapıntılar hipnozun niyə bəzi insanlar üçün daha təsirli, digərləri üçün isə daha az təsirli olduğunu başa düşməyə kömək edə bilər. EEG-dən istifadə edərək aşkar edilən sinir fəaliyyətindəki fərqlər hipnoza həssaslıq haqqında yeni anlayışlar təmin edir. Psixologiya və nevrologiyada gələcək tədqiqatlar üçün əsas ola bilər.