Aşiq Samirənin ilk duet ortağı kim oldu?

Əməkdar mədəniyyət işçisi Aşıq Samirə ilə "Qala" qrupunun solisti, bəstəkar-müğənni Ceyhun Əliyev bir araya gələrək, duet ifa ediblər. Lent.az-ın məlumatına görə, Aşiq Samirə C.Əliyevlə "Xoşbəxt oluram" adlı mahnıya klip də çəkdiriblər.

Ekran işinə quruluş verən rejissor Delee Lent.az-a açıqlama verərək deyib ki, sözügedən mahnı ilə klip eyni anda mediaya təqdim olunacaq: “ Samirə xanım və Ceyun bəyin istəyi bu oldu ki, sözləri idmançı Anar Süleymanov, musiqi Ceyhunun özünə məxsus olan mahnı vizual məhsul formasında sevənlərinə təqdim olunsun. "Xoşbəxt oluram" adlı duet internet saytlarında yerləşdirilməyib, heç radio dalğalarında da səslənmir. Klipdə Amerikada peşəkar stilistlərdən təhsil almış həmyerlimiz, Səbinə İsmayılovanın zəhmətini xüsusi vurğulamaq istəyirəm. Geyimlərin seçilməsindən tutmuş, qrimə qədər hər şey ona həvalə olunub. Sürpriz olsun deyə klipin süjet xəttini açıqlamıram. Ümid edirəm ki, tamaşaçılar çəkdiyimiz zəhməti layiqincə qiymətləndirəcəklər".

Klip barədə Aşiq Samirə də öz fikirlərini bölüşdü: "Mahnı o qədər pozitiv notlarla yazılıb ki, bunu hansısa sözlərə ifadə etməkdə çətinlik çəkirəm. Söz və musiqi bir-birini çox tamamlayır. İnşAllah eşidəndə çox oxucularınız mənimlə həmfikir olacaqlar. Tərif kimi çıxmasın, içimdən bir səs deyir ki, bu real hitə namizəddir. Bütün sevib-sevənlər "Xoşbəxt oluram" da öz pak hisslərini tapacaqlar. Ceyhun və Anara bu gözəl mahnı üçün təşəkkür edirəm. Klipin ilk çəkiliş gününə gəlincə, yaradıcı heyət bütünlüklə gənclərdən ibarətdir. Özüm də daim yenilik etməyə səy göstərən gənclərdənəm. Odur ki, həm Delee həm də Səbinə xanımın, komandamızın işindən razı qaldım. Əlbəttə ki, yekun qərarı tamaşaçı verəcək. Çəkdiyimiz zəhmətin hədər getməyəcəyinə inanıram".

Samirənin ilk duet ortağı Ceyhun da təəssüratlarını dilə gətirdi: "Bu duetin ilk notlarını yazanda özlüyümdə qərar verdim ki, yalnız Aşıq Samirə ilə mahnını ifa edə bilərik. Demək ki, fikrimdə yanılmadım. Samirə xanım mahnını dinləyəndə bəyəndiyini gizlətmədi və beləcə düşündüyüm duet ərsəyə gəldi. Məncə bu mahnı çox qısa zamanda sevgi himninə çevriləcək”.

Qeyd edək ki, fevralın sonlarında mediaya təqdim olunacaq.