Rusiyanın Smolensk vilayətində istintaq idarəsinin keçmiş əməkdaşları rüşvət almaqda və əməliyyat-axtarış tədbirlərinin nəticələrini saxtalaşdırmaqda ittiham olunaraq 7 il müddətinə azadlıqdan məhrum ediliblər.
Lent.az yerli mediaya istinadla bildirir ki, idarənin rəis müavini üç milyon rubl cərimə ilə cəzasını ciddi rejimli cəzaçəkmə müəssisəsində çəkməklə yeddi il müddətinə azadlıqdan məhrum edilib. Həmçinin ona altı il hüquq-mühafizə orqanlarında vəzifə tutmaq qadağan olunub.
Məhkəmə onun tabeliyində olan polis mayorunu isə cəzasını ümumi rejimli cəzaçəkmə müəssisəsində çəkməklə 7 il müddətinə azadlıqdan məhrum edib. Həmçinin ona üç il müddətinə dövlət qulluğunda hakimiyyət nümayəndəsi funksiyalarının həyata keçirilməsini nəzərdə tutan vəzifələri tutmaq qadağan olunub.
İş materiallarına görə, ötən il Daxili İşlər Nazirliyinin Leninqrad vilayəti üzrə İdarəsi aksizsiz siqaretlərin Rusiyaya qanunsuz aparılması ilə bağlı cinayət işi açıb.
Tütün məmulatı olan əcnəbi avtomobil müsadirə edilərək polis idarəsinin binasının yaxınlığında yerləşdirilib.
Avtomobilin sahibi tanışları vasitəsilə istintaq idarəsinin rəis müavini, polis polkovnik-leytenantı ilə əlaqə saxlayıb və maşının geri qaytarılmasında köməklik göstərilməsi üçün ona rüşvət təklif edib.
Polkovnik-leytenant bu təkliflə razılaşıb və keçmiş həmkarından qaçaqmalçılıqda günahı öz üzərinə götürəcək birini tapmağı xahiş edib. Polisin göstərişi ilə Poçinkovski rayon sakini müstəntiqin yanına gələrək etiraf ərizəsi yazaraq əsassız olaraq cinayəti etiraf edib.
Polis mayoru həmin şəxsin qaçaqmalçılıqla məşğul olmadığını bilsə də, onun barəsində cinayət işi açıb, onun fəaliyyət göstəricilərini süni şəkildə artırmağa cəhd edib. Hüquq-mühafizə orqanlarının əməkdaşlarının qanunsuz hərəkətləri nəticəsində avtomobilin sahibi avtomobilini geri alıb, polis əməkdaşları isə 1,1 milyon rubl məbləğində rüşvət alıblar.
Bizi Telegram-da izləyin
t.me/lent_az
Bizi Instagram-da izləyin
Bizi Facebook-da izləyin
Bizi Twitter-da izləyin
