Cavan Zeynallı: “Kişi kişiyə sevirəm deyir...” - MÜSAHİBƏ

- Cavan müəllim çoxdandır ki, görünmürsünüz. Hazırda nə işlə məşğulsunuz, yaradıcılığınızda nə kimi yeniliklər var?

- Mənə bu sualı çox verirlər ki, yaradıcılığımda nə yeniliklər var. Əslində mənə bu sualı verməməlidirlər. Çünki mən hər gün yeni nələrsə edirəm. Məni televiziya, radio proqramlarına çağırırlar, iştirak edirəm. Daim çalışıram. Mənə bu sualı vermək düzgün deyil. Bu sualı cavanlara vermək lazımdır. Misal üçün Röyaya bu sualı verə bilərlər.

- Sizi neçə illərdi sənətdəsiniz. Lakin Sizin bir dəfə də olsun, adınız qalmaqalda hallanmayıb. Sizə sülh sevər müğənni demək olar?

- Bütün xalq məni qalmaqal etmədiyimə görə sevir. Çünki mən heç zaman qalmaqala yadda qalmamışam. Bu mənim səviyyəmdir ki, mən qalmaqalda yoxam. İndiki müğənnilər isə yalnız qalmaqalla yadda qalır. Hər müğənnin öz yolu var. Məni qalmaqalda heç zaman görməyəcəksiniz.

- Cavan müəllim neçə illərdir ki, sənətdəsiniz. Yaradıcılıq işlərinizdə sponsorun dəstəyi olub? Heç ehtiyac duymusunuz sponsora?

- Sponsor elə olmalıdır ki, səviyyəli olsun. Bizim dövrdə sponsor olmayıb. İndi hər müğənnin sponsoru var. İndikilər sənətdən heç nə başa düşmürlər, sponsorluq edirlər. Mən dünyanı gəzmişəm - xaricdə müğənnin sponsoru yoxdur. Bizdə müğənnin sponsoru olmadısa, müğənni heç nədir. Bu isə çox pis haldır. Mən neçə illərdir sənətdəyəm mənim sponsorum olmayıb.

- Biz bilirik ki, Sizin bir çox qadın sənətçi ilə duetiniz var. İndi nədənsə duet oxumursunuz...

- Mənim duetlərim çox olub. Lakin oxuduğum duetləri indi heç özüm də tapa bilmirəm. Mənim xalq artistləri Flora Kərimova və Aygün Kazımova, müğənni Safura Əlizadə ilə duet oxumuşam. İndiki müğənnilər özləri mənə duet təklif etməlidirlər ki, “Cavan müəllim, gəlin oxuyaq”. Mən neçə illərdir sənətdəyəm. Gənc müğənniyə mən duet təklifi edə bilmərəm.

- Dünya şou-biznesində kişi müğənni həmcinsi ilə duet oxuyur, buna normal baxırlar. Sizə estradamızın kişi müğənnisindən duet təklifi gəlsə, bunu dəyərləndirərsiniz?

- Azərbaycanda kişi ilə duet oxumağa yaxşı baxmırlar. Biz “Qaya”da dörd nəfər kişi oxumuşuq. Ancaq iki oğlan duet oxuyarsa, bunu normal qarşılamazlar. Kişi ilə kişi duet oxuyanda, birtəhər baxarlar, başlayarlar nə isə axtarmağa... Hər adamın öz düşüncəsi var. Xarici estradada kişi ilə kişinin dueti normal qarşılanır. Bizdə də kişi ilə kişi duet oxuya bilər. Gərək yaxşı mahnı seçimi olsun. Yoxsa elə mahnı oxuyurlar ki, kişi kişiyə “sevirəm” deyir.

Yalçın Süleymanov