Sevgilisini bıçaqlayıb, uşağını öldürən kişiyə ÖMÜRLÜK CƏZA

Bakıda yeniyetməni öldürüb, anasına xəsarət yetirməkdə ittiham olunan Zaur Babayevin cinayət işi məhkəmə istintaqı başa çatıb.

Lent.az xəbər verir ki, bu gün dövlət ittihamçısı çıxış edib. Prokuror təqsirləndirilən şəxsə ömürlük cəza verilməsini istəyib.

Bakı Ağır Cinayətlər Məhkəməsinə hakim Leyla Əsgərova-Məmmədovanın sədrliyi ilə keçirilən prosesdə hökm oxunub.

Hökmə əsasən, Zaur Babayevə ömürlük cəza verilib.

Qeyd edək ki, hadisə bu ilin fevral ayında Sabunçu rayonunda qeydə alınıb.

Fevralın 2-si saat 01 radələrində Sabunçu rayonu ərazisində 2009-cu il təvəllüdlü Günay Şadatovanın xəstəxanada ölməsi barədə rayon prokurorluğuna məlumat daxil olub.

İlkin araşdırma zamanı Zaur Babayevin bıçaqla 1980-ci il təvəllüdlü Əfsanə Şadatova və onun qızı Günay Şadatovaya xəsarət yetirməsi və sonuncunun aldığı xəsarətdən xəstəxanada ölməsinə əsaslı şübhələr müəyyən edilib.

Daxili İşlər Nazirliyinin yaydığı məlumatda deyilir ki, cinayətdə şübhəli bilinən Zaur Babayev zərərçəkmiş Əfsanə Şadatova ilə qeyri-rəsmi münasibətdə olub.

Zaur Babayevə qarşı Cinayət Məcəlləsinin 120.2.4-cü ( xüsusi amansızlıqla adam öldürmə) maddəsi ilə ittiham irəli sürülüb.