“Western Union” pul köçürmələrini manatla ödəməyə başlayır

Lent.az-ın şirkətin rəsmi saytına istinadən verdiyi məlumata görə, yeni xidmət sayəsində müştərilər xaricdən aldıqları valyutanın dəyişdirilməsi üçün sərf olunan vaxta qənaət edə biləcəklər.

“Western Union”un Şərqi Avropa və MDB ölkələrindəki regional vitse-prezidenti Conatan Knaus deyib ki, yeni xidmət bizim müştərilərin istəklərini nəzərə alaraq hazırlanıb və beynəlxalq pul köçürmələri üçün maksimum rahat şəraitin yaradılmasına yönəlib: “Bu gün “Western Union” vasitəsilə edilən köçürmə həm ABŞ dolları, həm də manat formasında ödənilə bilər ki, bu da bizim Azərbaycandakı müştərilərimiz üçün əlavə rahatlıqdır”.

Qeyd edək ki, “Western Union” Azərbaycanda öz müştərilərinə bu cür xidmət təklif edən ilk şirkətdir və müştərilərinə pul köçürmələrini bank hesabı açmadan sürətli, təhlükəsiz və rahat şəkildə həyata keçirməyi təklif edir və nağd pulları bir neçə dəqiqə ərzində almaq imkanı verir. Sistemin üstünlüklərindən biri də köçürmənin konkret bir ödəmə məntəqəsinə bağlı olmamasındadır. Köçürməni xidmətin göstərildiyi ölkə ərazisində, istənilən məntəqədən almaq olar.