4 şirkət eyni məqsədli xidmətlər göstərəcək

Bərk Məişət Tullantılarının Vahid İdarəçiliyi Layihəsi çərçivəsində 4 istiqamətdə məsləhətçi şirkətlərin seçilər seçilib. Beynəlxalq tenderdə qalib gəlmiş “Ecodenge” (Türkiyə), “Integrated Skills” (Böyük Britaniya), “Harress Pikel Consult AG” (Yunanıstan) və “ACEP” (Azərbaycan) şirkətləri artıq fəaliyyətə başlayıb.

İqtisadi İnkişaf Nazirliyinin mətbuat xidmətindən Lent.az-a bildiriblər ki, Türkiyənin “Ecodenge” şirkəti ilə müqavilə imzalanıb. Bu xidmətlərə əsasən, Bakı şəhərində bərk məişət tullantılarının idarəçiliyi üzrə 20 illik inkişaf strategiyasının və “Təmiz Şəhər” ASC üçün strateji yenidənqurma planının hazırlanması nəzərdə tutulur. Bundan başqa, əhali sayının proqnozlaşdırılması, mövcud tullantı idarəçiliyi sistemi, tullantıların tərkibinin tədqiqi, institusional və maliyyə analizi, tariflərin öyrənilməsi və hüquqi aspektlər üzrə analitik təhlillərin aparılması planlaşdırılır.

Böyük Britaniyanın “Integrated Skills” şirkəti ilə imzalanmış müqavilə “Təmiz Şəhər” ASC-də ən yüksək keyfiyyət standartlarına əsaslanan müasir bərk məişət tullantıları idarəçiliyinin qurulması, inkişafı və gələcək fəaliyyətini formalaşdırılmasını nəzərdə tutur.

Balaxanı poliqonu daxil olmaqla, tullantı poliqonlarının bərpası və ya bağlanması üzrə məsləhət xidmətlərinin həyata keçirəcək “Harress Pikel Consult AG” şirkəti ilə imzalanmış müqaviləyə Bakı şəhəri ərazisində tullantıların idarə edilməsi sisteminin təkmilləşdirilməsi və bərk məişət tullantılarının ətraf mühitə zərərli təsirinin azaldılması aiddir.

Azərbaycanın “ACEP” şirkətinin göstərəcəyi xidmətlər isə layihənin komponentlərinin ətraf mühitə təsirinin qiymətləndirilməsi və idarəçiliyi planını hazırlamaqdan ibarətdir. Şirkət bu plan vasitəsilə Bakı şəhəri ərazisində tullantıların idarə edilməsi sisteminin təkmilləşdirilməsi və bərk məişət tullantılarının ətraf mühitə zərərli təsirinin azaldılması həyata keçiriləcəkdir.

Elxan SALAHOV