Sumqayıtda elektrik enerjisi dəyərinin ödənişi 100 faizi keçib

Sumqayıt Şəhər İcra Hakimiyyətindən Lent.az-a bildirib ki, ötən ay ərzində şəhərin güzəştsiz əhali qrupu tərəfindən 600,98 min manat dəyərində, 10016,35 min kilovatt/saat elektrik enerjisi istifadə edilib. Bunun müqabilində əhali tərəfindən 662,1 min manat dəyərində ödəniş olub.

İcra Hakimiyyətindən deyiblər ki, hazırda Sumqayıt şəhərinin güzəştsiz əhali kateqoriyası üzrə 79501 nəfər abonent var. Şəhər üzrə ümumilikdə 76113 ədəd elektrik sayğacı quraşdırılıb.

Yeri gəlmişkən, Sumqayıt şəhərində su sayğaclarının qurulması sahəsində də ciddi irəliləyişlər müşahidə olunur. “Azərsu” SC Su ölçü cihazlarının istismarı təsərrüfatı və su satışı müəssisəsinin Sumqayıt filialından verilən məlumata görə, hazırda bu şəhərdə güzəştsiz əhalinin 66,2 faizi su sayğacı ilə təmin edilib. 2010-cu ilin oktyabr ayında şəhərin güzəştsiz əhalisinə 415 min manat dəyərində içməli su verilib. Bunun müqabilində əhali tərəfindən 267 min manat dəyərində ödəniş olub ki, bu da 64,3 faiz təşkil edir.

Ötən ay Sumqayıtda 44574 abonent sudan istifadə haqlarını ödəyib. Hazırda Sumqayıt şəhərinin güzəştsiz əhali kateqoriyası üzrə 68470 nəfər abonent var.

Elxan SALAHOV