Bakı-Ələt yolu açıldı

Bakı-Ələt avtomobil yolunun yenidən tikilmiş 4-8-ci kilometrlik və yenidən qurulmuş 8-14-cü kilometrlik hissəsi bu gün istifadəyə verilib. Açılış mərasimində prezident İlham Əliyev də iştirak edib.

Lent.az AzərTAc-a istinadən bildirir ki, açılışda mərasimində nəqliyyat naziri Ziya Məmmədov yenidən qurulmuş yolun texniki göstəriciləri barədə prezidentə məlumat verib. O qeyd edib ki, “Bakı şəhərində nəqliyyat sisteminin təkmilləşdirilməsi üzrə 2008-2013-cü illər üçün əlavə Tədbirlər Planı”nın icrası ilə əlaqədar “Bakı-Ələt avtomobil yolunun 4-8-ci kilometrliyində Bibiheybət məscidi ilə Bayıl bazarı arasında yolun yeni trasa köçürülməklə yenidən qurulması” və “Bakı-Ələt avtomobil yolunun Bibiheybət–Lökbatan dairəsi sahəsinin yenidən qurulması” layihələri həyata keçirilib. 2009-cu ilin mayında tikintisinə başlanan layihəyə əsasən, yolun birinci dərəcəli 5 zolaqlı hissəsinin uzunluğu 3,5 kilometrdir. Yolun yenidən qurulan 5,7 kilometrlik hissəsi isə 8 zolaqlıdır.

Ziya Məmmədov deyib ki, bu magistral avtomobil yolunun istifadəyə verilməsi respublikanın cənub, cənub-qərb, qərb, mərkəzi aran və şimal-qərb bölgələrindən, həmçinin Astara, Biləsuvar, Qazax və Balakən rayonlarında yerləşən sərhəd məntəqələrindən Bakıya gələn nəqliyyat vasitələrinin paytaxta giriş hissəsində maneəsiz birtərəfli hərəkətlə şəhərə daxil olmasına imkan verəcək.