Yoxlamada çoxlu qanunsuzluqlar çıxdı

İqtisadi İnkişaf Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidməti Bakı-Quba şossesində yerləşən “Kauçuk” MMC-yə məxsus istehsalat sahəsində yoxlama aparıb.

Nazirliyin mətbuat xidmətindən Lent.az-a bildiriblər ki, yoxlama zamanı müəssisədə “Qranit” firmasının “Türksan kablo” əmtəə nişanından qanunsuz istifadə edərək elektrik kabel və naqillərinin istehsal olunduğu aşkarlanıb. Həmçinin elektrik kabel və naqillərin, plastik qapı və pəncərə rezinlərinin, havaçəkən alüminium boruların uyğunluq sertifikatının olmadığı müəyyən edilib. Yoxlama zamanı müəssisənin anbarında məhsulların qablaşdırılmasında istifadə edilən normativ sənədlərin tələblərinə uyğun olmayan bükmə materialları, kağız etiketlər və həmin materiallardan və etiketlərdən istifadə edilməklə qablaşdırılmış elektrik naqilləri də üzə çıxıb.

Yol verilmiş qanun pozuntuları ilə əlaqədar elektrik kabel və naqillərinin, plastik qapı və pəncərə rezinlərinin, havaçəkən alüminium borularının istehsalı və satışının, həmçinin müəssisənin anbarında aşkar edilmiş 27,1 min metr elektrik kabel və naqillərinin, 2,6 ton plastik qapı və pəncərə rezinlərinin, 1,3 min ədəd havaçəkən alüminium boruların satışının, “Türksan kablo” əmtəə nişanından qanunsuz istifadənin dayandırılması qərara alınıb. Həmçinin naqillərin qablaşdırılmasında istifadə edilən 352 kiloqram saxta bükmə materiallarının, habelə 3,8 min ədəd saxta kağız etiketin məhv edilməsi barədə “Kauçuk” MMC-yə icrası məcburi göstəriş verilib.

Antiinhisar Siyasəti və İstehlakçıların Hüquqlarının Müdafiəsi Dövlət Xidməti haqsız rəqabət hallarının qarşısının alınması məqsədilə araşdırmalarını davam etdirir

Elxan SALAHOV