9 ayda 520 müəssisə və obyekt özəlləşib

2010-cu ilin yanvar-sentyabr aylarında 520-yə yaxın kiçik dövlət müəssisə və obyekti, habelə nəqliyyat vasitəsi özəlləşdirilib. Həmin müəssisə və obyektlərdən 286-sı Bakıda, 122-si isə respublikanın digər şəhər və rayonlarında yerləşir.

Əmlak Məsələləri Dövlət Komitəsinin mətbuat xidmətindən Lent.az-a bildiriblər ki, ilin birinci yarısında 355-ə yaxın obyektin yerləşdiyi torpaq sahəsi özəlləşdirilib. Bu dövrdə dövlət müəssisələrinin bazasında 10-a yaxın səhmdar cəmiyyəti yaradılıb və səhmlərin satışı üzrə keçirilmiş 41 hərracda 25-ə yaxın səhmdar cəmiyyətin səhmləri satılıb.

İlin 9 ayında 7 dövlət müəssisəsi və səhmdar cəmiyyətinin (“Məişət Malları” ASC, “Biləsuvar Quşçuluq” ASC, “Qazax Konserv” ASC, “Lənkəran Çay-5” ASC, “Masallı Konserv” ASC, “Siyəsən Broyler” ASC və “Zeyxur” kiçik su elektrik stansiyası) səhmlərinin investisiya müsabiqəsi vasitəsi ilə özəlləşdirilməsi həyata keçirilib. İnvestisiya müsabiqəsi vasitəsilə özəlləşdirilmiş müəssisələrə 2010-cu ilin yanvar-sentyabr aylarında müqavilələr üzrə müsabiqə qalibləri tərəfindən 41 milyon manat məbləğində investisiya qoyulub. İnvestisiya müsabiqəsi vasitəsi ilə özəlləşdirilmiş 4 müəssisə (“Gəncə Dəyirman” ASC, “Salyan Mehmanxana” ASC, “Xırdalan Ət” ASC və “Bakı Ağırlaşdırıcılar” ASC) üzrə mülkiyyət hüququ alıcılara keçib.

Elxan SALAHOV