Ruslar Azərbaycanla oyuna bilet satışından 700 manat irəli düşmək istəyir

Futbol üzrə Azərbaycan və Rusiya milli komandaları arasında oktyabrın 15-də keçiriləcək 2014-cü il dünya çempionatının seçmə qrup matçının biletləri qonşu ölkədə 450 rubla satışa çıxarılıb. Lent.az-ın məlumatına görə, bu barədə Rusiya Futbol İttifaqının (RFS) rəsmi saytında bildirilir.

450 rubl Azərbaycan ekvivalentində 11 manat edir. Amma AFFA-nın rəsmi saytında açıqlanan siyahıda II kateqoriyalı biletlərə 8 manat, I kateqoriyalılara isə 10 manat qiymət qoyulduğu göstərilib. Qurumun Mətbuat və İctimaiyyətlə Əlaqələr Departamentinin rəisi Mikayıl Nərimanoğlu Lent.az-a deyib ki, RFS-ə 700 ədəd I kateqoriyalı bilet verilib.

Digər tərəfdən, “Bakcell Arena”da keçiriləcək oyun üçün stadionun tutumuna uyğun olaraq, 11000 bilet satışa çıxarılıb. Qaydalara əsasən, qonaq komandaya stadionun tutumunun 5 faizi həcmində yer ayrılmalıdır. Bu isə RFS-ə 550 bilet ayrılmalı olduğu anlamına gəlir. Lakin M. Nərimanoğlunun sözlərinə görə, Rusiya tərəfi Bakıya daha çox azarkeşinin gəlmək istədiyini bildirərək, daha 150 ədəd bilet istəyib.

Biletlərin alış və satış qiymətlərinə əsasən, belə qənaətə gəlmək olar ki, RFS 10 manatlıq biletə 11 manat qiymət qoyub. Doğrudanmı, bu assosiasiya bilet satışından 700 manat irəli düşmək istəyir?