Elnur Allahverdiyev rəsmən “Qəbələ”də

“Qəbələ” klubu heyətini daha bir futbolçu ilə gücləndirib. Lent.az-ın məlumatına görə, “Xəzər Lənkəran”dan qovulan Azərbaycan milli komandasının müdafiəçisi Elnur Allahverdiyevlə yarım illik müqavilə imzalanıb.

O, yeni klubunda 36 nömrəli forma ilə çıxış edəcək.

Keçidin rəsmiləşməsinin ardından Allahverdiyev ilkin təəssüratlarını “gabalafc.az”la paylaşıb: “Özümü çox yaxşı hiss edirəm. Ölkənin ən iddialı klublarından birinə keçdim. Artıq 2 gündür ki, Qəbələdəyəm. Çox gözəl atmosfer və futbol oynamaq üçün hər cür şərait var. Komandanın qarşısına böyük hədəflər qoyulub. Məqsədim bacarığımı ortaya qoyub komandanın hədəflərinə çatmasına kömək etməkdir. Özümü psixoloji və fiziki cəhətdən hazır sayıram. Baş məşqçimiz şans verdiyi an mübarizəyə atılmağa hazıram”.

Qeyd edək ki, Elnur Allahverdiyev əvvəllər “Xəzər Lənkəran”dan əlavə, “Ədliyyə”, “Şəfa”, MOİK, “Turan”, “Neftçi” və “Qarabağ”ın da formasını geyinib.