Blatter üzr istədi

FİFA prezidenti Yozef Blatter İspaniyanın “Real Madrid” klubunun və Portuqaliya milli komandasının futbolçusu Kriştianu Ronaldu barədə dediyi sözlərə görə üzr istəyib. Lent.az xəbər verir ki, Blatter “Real Madrid” rəhbərliyinə yazdığı məktubda heç vaxt “Real Madrid”i, onun oyunçularını və azarkeşlərini qaralamaq, onlara hörmətsizlik etmək niyyətində olmadığını vurğulayıb.

Ali futbol qurumunun başçısı Oksford Universitetindəki çıxışı zamanı Ronaldu ilə Lionel Messini müqayisə edib. O daha çox Argentina yığmasını və İspaniya “Barselona”sının hücumçusunu bəyəndiyini deyib. Blatter Messinin meydandakı davranışı, oyun tərzini yüksək qiymətləndirib. Portuqaliyalı hücumçuya gəldikdə, FİFA prezidenti “O, saç düzümünə daha çox vaxt ayırır” deyib.

Blatterin bu sözləri “Real Madrid” və Portuqaliya Futbol Federasiyası rəhbərliyinin xoşuna gəlməyib. “Kral klubu”nun prezidenti Florentino Peres FİFA prezidentindən izahat tələbi ilə ali futbol qurumuna məktub yazıb.