Azərbaycanlı idmançı məşhur döyüşçünü məğlub etdi

Honq Konqda muay-tay üzrə "Top King World Series" adlı dörd ən güclü idmançının iştirak etdiyi nüfuzlu turnirə yekun vurulub. Lent.az-ın məlumatına görə, ilk yarımfinalda azərbaycanlı döyüşçü, "Best of the Best" promoşn qrupunun üzvü Xəyal Canıyev Tailand boksunun canlı əfsanəsi, dünyanın ən güclü muay-tay döyüşçüsü Buakav Bançameklə üz-üzə gəlib. İlk raund zamanı Xəyalın güclü zərbəsinin qarşısını ala bilməyən Buakav başından ciddi zədə alıb. Bununla belə döyüş dayandırılmayıb. 3 raundluq görüş zamanı azərbaycanlı idmançı titullu rəqibini bütün komponentlərdə üstələyib. Yekunda uzun illər məğlubiyyət acısı yaşamayan Buakav Xəyal Canıyevə uduzub. Hakimlər yekdilliklə Xəyal Canıyevin qələbə qazandığını təsdiqləyib. "Best of the Best" promoşnun üzvünün qələbəsi dünyada böyük senssasiya kimi qəbul edilib. Tailand mətbuatı əfsanəvi idmançıları Buakav Bençamekin məğlubiyyətinə inanmaq istəmədiklərini yazıb.

Qeyd edək ki, 21 yaşlı Xəyal Canıyev Azərbaycanın Best of The Best promoşn qrupunun üzvüdür. K-1 brendinin sahibi olan promoşnun prezidenti Elnur Məmmədovun rəhbərliyi altında təşkilatda onlarla perspektivli idmançılar məşq edir. Ötən il Buakav Bençamek Bakıda keçirilən K-1 World Max-da iştirak edib və inamlı qələbə qazanıb.