“Xal itkiləri olmasa, çempionata maraq qalmaz” - MÜSAHİBƏ

Topaz Premyer Liqasının VIII turunda “Qarabağ”la qolsuz bərabərliklə yekunlaşan oyundan sonra “Neftçi” klubunun kapitanı Rəşad Sadiqov apasport.az saytının əməkdaşının suallarını cavablandırıb.

- Qarşılaşma barədə nə deyə bilərsiz?
- Rəqibin də çempionluq uğrunda mübarizə apardığını nəzərə alsaq, matçın çətin keçəcəyini bilirdik. Maraqlı oyun alındı. Fikrimcə, hər iki komanda layiq olduğu bir xalı qazandı.

- İlk yarı ilə müqayisədə ikinci hissədə zəif çıxış etdiniz. Bu, nə ilə bağlı idi?
- Birinci hissədə çox pressinq etdik. 90 dəqiqə ərzində bunu etmək mümkün deyil. İstər-istəməz yorğunluq yaranmışdı. Nəticədə oyunum nisbətə aşağı düşdü.

- Bəlkə fiziki hazırlıqla bağlı hansısa problem var?
- Elə düşünmürəm. Birinci hissədə imkanlarımız oldu. Pressinq edib, qol vura bilməyincə, üstəlik, yorğunluğu da bura əlavə etdikdə, oyunun səviyyəsi müəyyən qədər aşağı düşür.

- Ardıcıl iki oyunda 4 xal itirdiniz. Buna görə narahat deyilsiniz?
- İndi komandaların hamısı xallar itirir. Bu, normal haldır. Xal itkiləri olmasa, çempionata maraq qalmaz...

- Bu xal itkiləri hələlik “Qəbələ”nin işinə yarayır...
- “Qəbələ” “Simurq”la oyunda qələbə qazansa belə, aradakı fərq elə də böyük olmayacaq. Çünki növbəti turda qəbələlilərlə qarşılaşacağıq. Həm də istənilən oyunda xal itirmək mümkündür.