Messi “Barselona”ya qayıda bilər: Atası danışıqlar aparır

Hücumçu Lionel Messi mövsümün sonunda "Barselona"ya qayıda bilər.

Lent.az xarici mediaya istinadla bildirir ki, jurnalist Jerar Romeronun sözlərinə görə, Messi, atası və futbolçunun ətrafı Leonun Kataloniya klubuna mümkün qayıdışına doğru irəliləyir. Futbolçunun atası Xorxe Messi Joan Laporta ilə, Lionel isə Xavi ilə danışıq aparır.

“Messinin qayıdacağını söyləmək istəmirəm, amma mövqelər yaxınlaşır. Heç kimin inanmadığı bir ehtimal var. Xavi və Leo daimi ünsiyyətdədirlər”, - Romero bildirib.

Qeyd edək ki, bir neçə gün əvvəl Messinin atası: “Leonun “Barselona”ya dönəcəyini düşünmürəm. Təklif və ya şərtlər yoxdur”, - deyib.

Messi 2000-ci ildə "Barselona" sisteminə daxil olub və 2021-ci ilə qədər klubda çıxış edib. Daha sonra maddi problemlərə görə kataloniyalılar onunla müqaviləni yeniləyə bilməyib və Leo azad agent kimi PSJ-yə keçib.

Onun parislilərlə hazırkı müqaviləsi 2023-cü ilin yayına qədərdir.

Bu mövsüm argentinalı PSJ-nin heyətində bütün turnirlərdə 27 oyunda 16 qol vurub və 14 məhsuldar ötürmə edib.