İngiltərə millisindən gedəcəyini istisna etmədi

İngiltərə yığmasının baş məşqçisi Qaret Sautqeyt 2024-cü ildə Almaniyada keçiriləcək Avropa çempionatının onun milli komandasını böyük turnirdə qələbəyə aparması üçün son şans ola biləcəyini deyib.

Lent.az xarici mediaya istinadən bildirir ki, 53 yaşlı Sautqeyt 2016-cı ildən İngiltərə millisinə rəhbərlik edir, müqaviləsi 2024-cü il dekabrın 31-nə qədərdi. Onun rəhbərliyi altında ingilislər 2018-ci il Dünya çempionatının yarımfinalına və 2020-ci il Avropa çempionatının finalına yüksəlib, 2022-ci il Dünya çempionatında isə 1/4 finalda mübarizədən kənarlaşdırılıb.

“Qələbə qazanmasaq, yəqin ki, daha burada olmayacağam. Ona görə də bu mənim son şansım ola bilər. Düşünürəm ki, milli komandaların məşqçilərinin təxminən yarısı turnirlərdən sonra gedir - beynəlxalq futbolun mahiyyəti budur.

Mən səkkiz ilə yaxındır ki, buradayam və biz yaxın olmuşuq. “Zəhmət olmasa, bir az daha” deməyə davam edə bilməzsiniz. Bəzi məqamlarda insanlar sadəcə olaraq sözlərinizə inamını itirirlər.

Əgər biz böyük komanda olmaq istəyiriksə, mən top-məşqçi olmaq istəyirimsə, o zaman vacib anlarda nəticə göstərməliyik”, - Sautqeyt deyib.

İngiltərə AVRO-2024-ün qrup mərhələsində Serbiya (16 iyun), Danimarka (20 iyun) və Sloveniya (25 iyun) ilə qarşılaşacaq.