Dünya və Avropa çempionundan Ronaldoya sərt MESAJ: “Qoy sussun”

"Çelsi"nin və Fransa millisinin keçmiş futbolçusu Frank Lebef Kriştianu Ronaldonun Liqa 1 ilə bağlı dediyi sözlərə qəzəblənib.

Lent.az-ın xarici KİV-ə istinadən xəbərinə görə, “Əl-Nəsr”in portuqaliyalı hücumçusu Kriştiano Ronaldo Səudiyyə Ərəbistanı çempionatının Fransa Liqa 1-dən daha rəqabətli olduğuna inandığını bildirib. Frank Lebef bu fikirdən əsəbiləşdiyini bildirib.

“Kriştiano deyir ki, Lionel Messi Liqa 1-də oynayıb. Mən ona bir oyunçu kimi çox hörmət edirəm, amma o, susmalıdır! Bu, Liqa 1-ə qarşı ədalətsizlikdir”, –dünya və Avropa çempionu söyləyib.

Frank Lebef onu da əlavə edib ki, Ronaldo heyətində olmasa, Portuqaliya millisi Avro 2024-ü qazana bilər.

“Məncə, Portuqaliya əslində bu yay Avropa Çempionatını qazanmağa iddialılardan biridir. Mən, həqiqətən, onların Avro-2024-ü qazana biləcəyini düşünürəm, ancaq Kriştiano Ronaldo oynamasa. İdmanı yeni səviyyəyə qaldırdığı üçün ona təşəkkür etmək istəyirəm, amma hər şey sona çatır", - Lebef deyib.

Lebef tənqidi şərhləri ilə tanınır. Əvvəllər o, Neymarı simulyasiya etməkdə günahlandırıb, eyni zamanda “Çelsi”nin bu mövsümdəki çıxışından da mənfi danışıb.