Argentinaya dünya çempionatına görə iş qaldırıldı - SƏBƏB

Beynəlxalq Futbol Federasiyası (FİFA) Argentina Futbol Assosiasiyasına (AFA) qarşı intizam işi açıb.

Lent.az xəbər verir ki, bu barədə FİFA-nın saytında bəyanat qeyd olunub. Bəyanatda deyilir ki, intizam işi təhqiredici davranış və ədalətli oyun prinsiplərinin pozulması ilə bağlı maddələrin mümkün pozulması, habelə oyunçular və rəsmilər tərəfindən qanunsuz davranışlar səbəbindən qaldırılıb. Bildirilir ki, söhbət 2022-ci ildə Qətərdə keçirilən dünya çempionatının final oyununda futbolçuların davranışından gedir.

Bundan əvvəl Messinin 1/4 final matçından sonra verdiyi müsahibə zamanı hollandiyalı hücumçu Vout Veqorstu təhqir etdiyi məlum olub. Belə ki, Messi rəqibinə, “Sən nəyə baxırsan, əclaf? Get burdan”, – deyə nalayiq ifadə səsləndirib. O, davranışını belə izah edib ki, Veqorst oyundan əvvəl və oyun zamanı komandanı təhrik edib.

2022-ci il dekabrın 18-də Argentina millisi Qətərdə keçirilən turnirin final oyununda Fransanı məğlub edərək tarixdə üçüncü dəfə kuboku qazanıb. Əsas vaxt 2:2 hesabı ilə başa çatıb. Əlavə vaxtda komandalar hərəyə bir qol vurub. Penaltilər seriyasında Argentina daha güclü olub - 4:2.