Roberto Karlos rəsmən “Anji”də

Lent.az-ın klubun rəsmi saytına istinadən verdiyi məlumata görə, aprelin 10-da 38 yaşı tamamlanacaq müdafiəçi 2,5 illik sövdələşməyə imza atıb.

Anlaşmanın belə uzunmüddətli olması Rusiya Premyer Liqasında növbəti mövsümün ilyarım davam edəcəyi ilə bağlıdır. Karlosun yeni komandasına fevralın 19-da qoşulacağı bildirilir.

Roberto Karlos karyerası ərzində Braziliyanın “Uniao San-Joao”, “Palmeyras”, İtaliyanın “İnter”, İspaniyanın “Real Madrid”, Türkiyənin “Fənərbağça” klublarında çıxış edib. O, Braziliyanın “Korintians” komandasında da qısa müddət çıxış etdikdən sonra müqaviləsini pozub. Yığmada 125 matçda 11 qol vurub.

Qeyd edək ki, Roberto Karlos “Anji”də Azərbaycan yığmasının müdafiəçisi Mahir Şükürovun komanda yoldaşı olacaq və böyük məşqçi Vaqif Sadıqovun rəhbərliyi altında çıxış edəcək. Hazırda Türkiyənin Antalya şəhərində təlim-məşq toplantısında olan Mahaçqala komandası martın ilk 10 günlüyündə “Bakı”nın bazasında da hazırlıq prosesi keçəcək. Bu müddətdə “Anji”nin “Bakı” və ya “Qarabağ”la yoldaşlıq görüşü keçirəcəyi də gözlənilir.