FİDE prezidenti qalmaqal yaradan rəqibinə müavini postu təklif etdi

Bu gün Rusiyanın Xantı-Mansiysk şəhərində keçirilmiş seçkidə yenidən Beynəlxalq Şahmat Federasiyasının (FİDE) prezidenti seçilən Kirsan İllümjinov bu seçkidə rəqibi olmuş 12-ci dünya çempionu Anatoli Karpov FİDE-nin vitse-prezidenti postunu təklif edib. Lent.az-ın verdiyi məlumata görə, Kirsan İllümjinov bunu “Exo Moskvı” radiosuna açıqlamasında söyləyib.

Anatoli Karpov hələ təklifə münasibət bildirməyib.

Qeyd edək ki, Anatoli Karpov seçkiöncəsi sərt bəyanatla çıxış edərək, səsverməni qeyri-qanuni adlandırıb. Anatoli Karpovu Harri Kasparov dəstəkləyib. Bu zaman zalda çaxnaşma düşüb və iclas yarım saatadək dayandırılıb. Sonra İllümjinov Karpovun komandasına güzəştə gedərək, səssayma komissiyası üzvlərindən ikisini dəyişdirib. Ardından namizədlər seçkiqabağı proqramlarını təqdim ediblər. Nəhayət, səsvermə keçirilib və Kirsan İllümjinov növbəti 5 il müddətinə prezident seçilib.

Kirsan İllümjinov 1995-ci ildən FİDE-yə rəhbərlik edir.