Çempionlar Liqası: “Bursaspor”un hansı futbolçusu tarixə düşəcək?

Lent.az-ın məlumatına görə, turnirdə Türkiyənin yeganə təmsilçisi “Bursaspor” Şotlandiyada “Reyncers” komandasının qonağı olacaq.

Qlazqo şəhərindəki “Aybroks” stadionunda baş tutacaq görüşü belçikalı baş hakim Serj Qumyennı idarə edəcək. İlk turda “Bursaspor” öz meydançasında İspaniya “Valensiya”sına böyük hesabla uduzub – 0:4. “Reyncers” isə İngiltərədə “Mançester Yunayted”lə heç-heçə edib – 0:0.

“Reyncers”lə görüş öncəsi mətbuat konfransında “Bursaspor”un baş məşqçisi Ərtuğrul Sağlam Çempionlar Liqasında ilk xalı və ya xalları almaq istədiklərini bildirib. O, qrupda ən azı 3-cü yeri tutaraq, mübarizəni Avropa Liqasında davam etdirmək niyyətində olduqlarını açıqlayıb: “Hədəfimizdən uzaqlaşmamaq üçün Qlazqo səfərindən itkisiz qayıtmalıyıq”.

“Reyncers”in baş məşqçisi Uolter Smit isə bildirib ki, “Bursaspor”u yenəcəkləri halda xallarını 4-ə çatdıracaqlar. Bu da çox önəmli üstünlükdür. Amma Şotlandiya çempionu görüşə bir oyunçu itkisi ilə çıxacaq. Şimali İrlandiya yığmasının yarımmüdafiəçisi Stiven Devis zədə üzündən Türkiyə çempionlarına qarşı forma geyinməyəcək. Bu oyunda “Bursaspor”un hər hansı futbolçusu fərqlənə bilsə, “timsahlar”ın Çempionlar Liqasında ilk qolunun müəllifi kimi tarixə düşəcək.

A qrupu

“Tottenhem” (İngiltərə) – “Tvente” (Hollandiya)
Baş hakim: Terye Hauqe (Norveç)

“İnter” (İtaliya) – “Verder” (Almaniya)
Baş hakim: Alberto Undiano Malyenko (İspaniya)

B qrupu

“Hapoel” (Təl-Əviv, İsrail) – “Lion” (Fransa)
Baş hakim: Hovard Uebb (İngiltərə)

“Şalke 04” (Almaniya) – “Benfika” (Portuqaliya)
Baş hakim: Canluka Rokki (İtaliya)

C qrupu

“Valensiya” (İspaniya) – “Mançester Yunayted” (İngiltərə)
Baş hakim: Viktor Kaşşai (Macarıstan)

“Reyncers” (Şotlandiya) – “Bursaspor” (Türkiyə)
Baş hakim: Serj Qumyennı (Belçika)

D qrupu

“Rubin” (Rusiya) – “Barselona” (İspaniya)
Baş hakim: Cüneyt Çakir (Türkiyə).

“Panatinaikos” (Yunanıstan) – “Kopenhagen” (Danimarka)
Baş hakim: Uilyam Kollum (Şotlandiya).

Bakı vaxtı ilə saat 21:30-da başlanacaq “Rubin” – “Barselona” matçı istisna olmaqla, qalan görüşlər saat 23:45-də başlanacaq.