Milli komandada yeni baş məşqçi – FOTO

Lent.az-ın “Reuters”ə istinadən verdiyi məlumata görə, bu, 2005 – 2009-cu illərdə “Sportinq” komandasına rəhbərlik etmiş Paulu Bentudur. Bentu FPF prezidenti Jilberto Madaillə görüş zamanı müqavilə şərtlərini razılaşdırıb. Onun təyinatı haqda rəsmi açıqlama sentyabrın 21-də veriləcək. 41 yaşlı mütəxəssis bu vəzifədə Karluş Keyruşu əvəzləyəcək. Keyruş baş məşqçi postundan sentyabrda qovulub.

Qeyd edək ki, 2010-cu il dünya çempionatında 1/8 finalda mübarizəni dayandırmış Portuqaliya millisi 2012-ci il Avropa çempionatına da uğursuz start götürüb. Komanda əvvəlcə Kiprlə 4:4 hesablı heç-heçə edib, ardından Norveçə uduzub – 0:1. Paulu Bentu isə “Sportinq”ə 4 dəfə ölkə çempionatının gümüş medalını qazandırsa da, 2009-cu ildə işini itirib. O, oyunçu kimi “Benfika” və “Sportinq”də, eləcə də 35 dəfə Portuqaliya millisində çıxış edib. Yığmanı oktyabrın 8-də Danimarka, bundan 4 gün sonra isə İslandiya ilə seçmə oyunlar gözləyir.