Azərbaycan olimpiada keçirməkdən imtina etdi

Bu haqda Lent.az-a Azərbaycan Şahmat Federasiyasının (AŞF) vitse-prezidenti Mahir Məmmədov məlumat verib.

Onun sözlərinə görə, bir müddət öncə FİDE-dən belə bir təklif alıblar. Lakin ali şahmat qurumuna müsbət cavab verilməyib. Məmmədov AŞF-nin belə reaksiyasını olimpiada təşkil edən ölkəyə digər böyük yarışların da həvalə olunması ilə əlaqələndirib: “FİDE istəyir ki, olimpiada təşkil edən ölkə bir sıra beynəlxalq yarışlara da ev sahibliyi etsin. Amma bizim belə bir fikrimiz yoxdur”.

2011-ci ildə keçiriləcək şahmat tacına iddiaçıların turniri məhz Ermənistan təmsilçisi Levon Aronyanın ölkəmizə gəlməkdən imtinası ilə əlaqədar Bakıdan alınaraq, Rusiyanın Kazan şəhərinə verilib. Lakin AŞF rəsmisi FİDE-nin olimpiada təklifindən imtina etmələrində siyasi amillərin rolunu inkar edib. Məmmədov bildirib ki, 2016-cı və 2018-ci il olimpiadalarına namizədliklərini irəli sürüb-sürməyəcəklərinə dair hələ qərar verməyiblər.

Qeyd edək ki, 2014-cü il XXX Ümumdünya Şahmat Olimpiadasına Bolqarıstanın Albena və Norveçin Tromse şəhərləri iddialıdır. Yekun qərar 29 sentyabr – 2 oktyabrda Rusiyanın Xantı-Mansiysk şəhərində keçiriləcək FİDE-nin Baş Assambleyasında veriləcək.

Elşən Məmmədov