Rusiya Unibank Premyer Liqasından nümunə götürdü

Lent.az-ın məlumatına görə, bu haqda Rusiya Futbol İttifaqının İcraiyyə Komitəsi qərar qəbul edib.

İK-nın 31 üzvündən 1-i qərarın əleyhinə səs verib, 1-i isə bitərəf qalıb. Yeni sistemə keçidə yalnız Rusiya Peşəkar Futbol Liqasının prezidenti Nikolay Tolstıx etiraz edib.

Yeni sistem 2011-2012-ci il mövsümündən qüvvəyə minəcək. 2011-ci ilin yayında başlanacaq çempionatda 16 komanda əvvəlcə 2 dövrəlik mübarizə aparacaq. Daha sonra 3-cü dövrə başlanacaq. Bu zaman komandalar 2 qrupa bölünəcəklər. 1-8-ci yerləri tutanlar çempionluq və Avropa kuboklarına vəsiqə uğrunda, 9 – 16-cı yerlərin sahibləri isə Premyer Liqada qalmaq üçün mübarizə aparacaqlar. Yekunda 15-16-cı yerləri tutanlar elitanı tərk edəcəklər. 13-14-cü yerlərin sahibləri isə I divizionda 3-4-cü yerləri tutanlarla “pley-off” qarşılaşmaları keçirəcəklər.

Qeyd edək ki, Unibank Premyer Liqasında da hazırda buna bənzər sistemdən yararlanırlar. Fərq isə bunlardır: Azərbaycan çempionatında 16 deyil, 12 komanda mübarizə aparır. Onlar ilk 2 dövrədən sonra “8-lik” yox, “6-lıq” sistemi ilə mübarizəni davam etdirirlər. Çempionat isə 3 dövrə yox, 4 dövrədən ibarətdir.