Sığorta şirkəti yol qəzası ilə bağlı məlumat yaydı - YENİLƏNİB

“Atəşgah” sığorta şirkəti İsmayıllı rayonunda baş vermiş ağır yol qəzası ilə bağlı məlumat yayıb. Lent.az-a daxil olan məlumatda bildirilir ki, ölümlə nəticələnən yol-nəqliyyat hadisəsini törədən sürücü Əzizov Elman Əjdər oğlunun idarə etdiyi “VAZ 2110” markalı avtomobil şirkətə deyil, onun özünə məxsus olub: “Hadisə noyabrın 19-da saat 19.00- 20.00 radələrində baş verib (yəni, iş saatları bitdikdən sonra). Piyada yolu qaçaraq keçərkən E.Əzizov avtomobili dayandırmağa cəhd edib. Lakin buna müvəffəq ola bilməyib. Sürücü E.Əzizov yaralını xəstəxanaya çatdırsa da, piyada iki saat sonra beyin qansızması nəticəsində vəfat edib. Mərhumun ailəsi tərəfindən hadisə ilə bağlı heç bir şikayət daxil olmayıb. Faktla bağlı araşdırmalar aparılır”.

*****

20.11.2013 / 11:33

Noyabrın 19-da İsmayıllı rayonunda ölümlə nəticələnən yol qəzası baş verib. Rayon Polis Şöbəsindən Lent.az-a verilən məlumata görə, “Atəşgah” sığorta şirkətinin sürücüsü, 1974-cü il təvəllüdlü Əzizov Elman Əjdər oğlu idarə etdiyi “VAZ 21010” markalı avtomobil ilə Vaşa kənd sakini 1940-cı il təvəllüdlü Xanəliyev Ağalar Qərib oğlunu vurub. 73 yaşlı kişi aldığı xəsarətlərdən hadisə yerindəcə keçinib.

Faktla əlaqədar cinayət işi açılıb, araşdırmalar aparılır.