Qanunsuz ov edənlər saxlanıldı
11 noyabr 2014 13:42 (UTC +04:00)

Qanunsuz ov edənlər saxlanıldı

Noyabrın 7-dən 10-na qədər Ekologiya və Təbii Sərvətlər və Daxili İşlər nazirliklərinin əməkdaşları “Ovçuluq haqqında” qanunun tələblərinə əməl olunması vəziyyətinin araşdırılması məqsədilə respublika ərazisində növbəti reydlər keçirib. Ekologiya və Təbii Sərvətlər Nazirliyinin mətbuat xidmətindən Lent.az-a verilən məlumata görə, reydin ilk günündə Neftçala rayonunun Müşfiq qəsəbəsi ərazisində ov edən naməlum şəxs saxlanılıb. Saxlanılan şəxsdən 1 ov tüfəngi, 1 patron götürülərək, qanuna uyğun qaydada akt tərtib olunub. Sənəd təqdim etməyən qanun pozucusunun şəxsiyyətinin müəyyən edilməsi və barəsində qanunvericiliyə uyğun tədbir görülməsi üçün Neftçala rayon Polis Şöbəsinə müraciət edilib.

Noyabrın 8-də Ağcabədi rayonu Qaradolaq kəndi ərazisində keçirilən reyd zamanı ov edən Ağcabədi şəhər sakini Novruz Kərimov saxlanılaraq ondan 1 ov tüfəngi, 4 patron, 2 qaranaz quşu götürülüb. Qanun pozucusu barəsində akt və protokol tərtib edilərək 1000 manat məbləğində cərimə olunub. Götürülmüş ov quşları isə yandırılaraq məhv edilib. Həmçinin, həmin gün “Ağzıbir” ovçuluq təsərrüfatının ərazisində ov etmək istəyən naməlum şəxs ərazidə reyd keçirən Nazirliyin əməkdaşlarını görən zaman ov tüfəngini və ovladığı quşları ataraq ərazidən uzaqlaşıb. Nazirliyin əməkdaşları onu təqib etsələr də, qanun pozucusunu saxlamaq mümkün olmayıb. 1 ov tüfəngi, 200 patron, 9 ovlanmış  qaşqaldaq quşu götürülərək fakt üzrə akt tərtib olunub və götürülmüş ov quşları yandırılaraq məhv edilib. Təqsirkarın şəxsiyyətinin müəyyənləşdirilməsi məqsədilə Şabran rayon Polis Şöbəsinə müraciət olunub. Eyni zamanda, həmin gün Qızılağac Dövlət Təbiət Qoruğunun ərazisində keçirilmiş reyd zamanı ovla məşğul olan daha bir naməlum şəxs saxlanılaraq ondan 1 ov tüfəngi götürülüb. Həmin şəxs barəsində akt tərtib olunaraq şəxsiyyətinin müəyyən edilməsi üçün Lənkəran rayon Polis şöbəsinə müraciət edilib.

Noyabr 9-da da Samux ovçuluq təsərrüfatında qanunsuz ov edən Goranboy rayon Şəmmədli kənd sakini Şakir İsgəndərov  və İlisu Dövlət Təbiət Qoruğunun ərazisində ov edən Qax rayonu Qaxbaş kənd sakini Zeriko Poladaşvili saxlanılaraq onlardan 2 ov tüfəngi, 4 patron götürülüb. Akt və protokollar tərtib olunaraq həmin şəxslərin hər biri 1000 manat məbləğində cərimə edilib.

Reydin sonuncu günündə isə  Yevlax və Lənkəran rayonları ərazisində ov edən naməlum şəxslər saxlanılıb. Onlardan 2 ov tüfəngi və 14 patron götürülüb. Hər iki fakt üzrə akt tərtib edilib, təqsirkarların şəxsiyyətlərinin müəyyənləşdirilməsi və barələrində rayon Polis Şöbələrinə müraciət olunub.

Qeyd edək ki, ölkə ərazisində qanunsuz ov hallarının qarşısının alınması məqsədilə Ekologiya və Təbii Sərvətlər və Daxili İşlər Nazirliklərinin əməkdaşları tərəfindən birgə reydlər davam etdirilir. 

# 535
avatar

Yalçın UĞUR

Oxşar yazılar