Maşallah Əhmədov xəstəxanaya yerləşdirilib

Dələduzluqda təqsirləndirilən keçmiş futbolçu Maşallah Əhmədovun cinayət işi üzrə bu günə təyin olunan məhkəmə prosesi təxirə salınıb.

Lent.az-ın məlumatına görə, Bakı Ağır Cinayətlər Məhkəməsində hakim Mirzə Xankişiyevin sədrliyi ilə keçirilməli olan proses təxirə düşüb. Buna səbəb M. Əhmədovun səhhətində yaranan ciddi problemlərə görə xəstəxanaya yerləşdirilməsinin olduğu bildirilib.

Məhkəməyə bu barədə klinikadan müraciət daxil olub.

Buna görə məhkəmə prosesi qeyri-müəyyən vaxtadək təxirə salınıb.

Xatırladaq ki, dövlət ittihamçısı Maşallah Əhmədovun 9 il müddətə azadlıqdan məhrum edilməsini istəmişdi. Bu gün Maşallah Əhmədov son sözlə çıxış edəcəkdi.

M. Əhmədov 2015-ci ilin dekabrında saxlanılıb. Bizneslə məşğul olan "Neftçi"nin keçmiş futbolçusu Bakıda bir neçə nəfərə 150 min manatdan artıq dəyərdə xaricdən daş plitə gətirəcəyini vəd edib. Lakin o, sözünə əməl etməyib və həmin şəxslərin pulunu da qaytarmayıb.

M. Əhmədov barəsində həbs qətimkan tədbiri seçilsə də, sonradan bu qərar ev dustaqlığı ilə əvəzlənib.