İrandan psixotrop maddə sayılan dərman gətirilməsinin qarşısı alındı

Biləsuvar Gömrük İdarəsinin “Qoşa Təpə” gömrük postunda İrandan Azərbaycana piyada gələn Azərbaycan vətəndaşı Əziz Məmmədova məxsus irihəcmli selofan torbaya baxış keçirilib.

Gömrük Komitəsindən Lent.az-a verilən məlumata görə, baxış zamanı torbada gömrük nəzarətindən gizlədilmiş, hər birində 10 ədəd kapsul olmaqla 94 konvalyut “Tramadol Capsules 100 mg” adlı və hər birində 20 ədəd həb olmaqla 72 konvalyut “Diazepam 10” adlı dərman preparatları aşkarlanıb.

“Diazepam 10” adlı dərman preparatı “Azərbaycan Respublikasının ərazisində dövriyyəsinə nəzarət edilən psixotrop maddələr”in III siyahısına daxildir və 1440 ədəd həbdə diozepamın təsiredici maddəsinin ümumi miqdarı 14,4 qram təşkil edir.

Biləsuvar Gömrük İdarəsinin “Qoşa Təpə” gömrük postunda İran İslam Respublikasından Azərbaycan Respublikasına piyada gələn Azərbaycan vətəndaşı Adil Qənbərova məxsus irihəcmli selofan torbaya da baxış keçirilib və hər birində 10 ədəd kapsul olmaqla 204 konvalyut “Tramadol Capsules 100 mg”, hər birində 20 ədəd həb olmaqla 62 konvalyut “Diazepam 10” adlı və hər birində 10 ədəd həb olmaqla 42 konvalyut “Clonazepam 2” adlı dərman preparatları aşkarlanıb. 1240 ədəd həbdə diozepamın təsiredici maddəsinin ümumi miqdarı 12,4 qram təşkil edir. “Clonazepam 2” adlı dərman preparatı da “Azərbaycan Respublikasının ərazisində dövriyyəsinə nəzarət edilən psixotrop maddələr”in III siyahısına daxildir və 420 ədəd həbdə klonazepamın təsiredici maddəsinin ümumi miqdarı 0,84 qram təşkil edir.