Gülər Əhmədovanın məhkəməsində ekspertizanın rəyi açıqlandı: Videodakı səslər montaj deyilmiş

Bu gün Bakı Ağır Cinayətlərə dair Məhkəmədə Gülər Əhmədova barəsində başlanan məhkəmə işi davam etdirilib. Lent.az-ın məlumatına görə, hakim Əlisultan Osmanovun sədrliyi ilə keçirilən iclasda şahid ifadələri məhdudlaşdırılıb və sənədlərin tədqiqi mərhələsi başlanılıb.

Vəkil Əfsər Talıbov video və audioyazılarla bağlı ekspertiza araşdırmalarının oxunmasını xahiş edib. Elşad Abdullayevin yaydığı video-görüntülərin istintaqa təqdim edilmiş tam versiyasının ekspertiza nəticəsi oxunub. Ekspertizada qeyd edilib ki, həmin kadrlarda 3 nəfərin – Elşad Abdullayev, Sevinc Babayeva və Gülər Əhmədovanın səsləri olduğu təsdiqlənib. Həmçinin ekspertiza belə qənaətə gəlib ki, bu kadrları saxtalaşdırmaq mümkün deyil. Videofaylın formatı dəyişdirildiyi üçün onun çəkilmə tarixini müəyyənləşdirmək mümkün olmayıb. Həm də görüntülərdəki şəxslərin hərəkət və mimikaları danışıqları ilə sinxron olub.