Dəmiryolu vağzalı ərazisində yanğın - YENİLƏNİB-5 -VİDEO

Bakının Süleyman Rəhimov küçəsində tikilməkdə olan binada başlamış yanğın 2 min kvadratmetr ərazini əhatə edib. APA-nın xəbərinə görə, bunu Dövlət Yanğından Mühafizə Xidmətinin yanğın söndürmə qərargahının rəisi Əkbər Novruzov bildirib. Onun sözlərinə görə, yanğın barədə məlumat 20.13-də daxil olub. «Binaya ciddi ziyan dəyib. Hadisə nəticəsində xəsarət alan olmayıb. Yanğın qarşısı təxminən 90 dəqiqəyə alınıb. Yanğın 2 min kvadrat metr ərazini əhatə edib və bir neçə binaya zərər dəyib. Təhqiqat aparılır. Hadisənin səbəbləri araşdırılır», deyə Ə.Novruzov əlavə edib

***

22. 57

Bakının Süleyman Rəhimov küçəsində tikilməkdə olan binada başlayan yanğın söndürülüb. Bu barədə APA-nın hadisə yerində olan müxbiri xəbər verir.

***

21.52

Bakının Süleyman Rəhimov küçəsində tikilməkdə olan binada başlayan yanğın həmin əraziyə bitişik olan bazara keçərək bu ticarət obyektini demək olar ki, məhv edib. Bu barədə APA-nın hadisə yerində olan müxbiri məlumat verir. Məlumata əsasən, yanğının söndürülməsi üzrə tədbirlər davam edir. Hazırda fövqəladə hallar nazirinin müavini Etibar Mirzəyev, Fövqəladə Hallar Nazirliyinin Dövlət Yanğından Mühafizə Xidmətinin rəisi Füzuli Əsədov və Bakı metropoliteninin rəisi Tağı Əhmədov hadisə yerindədirlər.

***

21.43

Bakının Süleyman Rəhimov küçəsində tikilməkdə olan binada başlayan yanğın Mirəli Qaşqay küçəsindəki tikililərə doğru irəliləyir. Həmin istiqamətdəki tikililərdə yaşayan sakinlər mənzillərini tərk edirlər. Hadisə yerindəki yanğınsöndürənlər yanğının Mirəli Qaşqay küçəsinə adlamasının qarşısını almağa çalışırlar. Artıq hadisə yerindəki yanğınsöndürən maşınların sayı 15-ə çatıb.

***

20.55

Bakının mərkəzində yanğın başlayıb. APA-nın müxbirinin məlumatına görə, yanğın paytaxtın Süleyman Rəhimov küçəsində tikilməkdə olan hündürmərtəbəli binanın 4-cü mərtəbəsində ağac materiallarının yanması ilə başlayıb. Hadisə yerinə artıq 10 yanğınsöndürən maşın cəlb olunub. Hazırda yanğının söndürülməsi üzrə işlər davam etdirilir.

Bakının mərkəzində yanğın başlayıb. APA-nın müxbirinin məlumatına görə, yanğın paytaxtın Xətai prospektində dəmiryolu vağzalının arxasındakı tikililərdən birində başlayıb.