Bakıda tanınmış müğənninin evini yardılar, külli miqdarda qızıl-brilyant aparılıb

Bir neçə ay əvvəl Bakıda tanınmış müğənni Pərvin Lətifova məxsus ev yarılıb. Lent.az-ın əldə etdiyi məlumata görə, müğənniyə məxsus olan və Yeni Yasamalda yerləşən çoxmərtəbəli binadakı mənzildən qapını sındırmaq yolu ilə külli miqdarda qızıl, pul və avadanlıq aparılıb. Müğənniyə ümumilikdə 10 min manatdan artıq ziyan dəyib.

Bir müddət sonra hadisəni törədən 1977-ci il təvəllüdlü Niyaməddin Əliyev saxlanılıb. Onun barəsində başlanmış cinayət işi ilə bağlı məhkəmə prosesi isə Bakı Ağır Cinayətlər Məhkəməsində aparılır. Noyabrın 17-də işlə bağlı zərərçəkmiş qismində müğənni Pərvin Lətifov məhkəmədə ifadə verib. O bildirib ki, oğurluq evdə kimsənin olmadığı vaxt baş verib.

Pərvin Lətifov Lent.az-a açıqlamasında faktı təsdiqləyib. Müğənni bildirib ki, məhkəmə prosesi davam etdirilir: “Həmin şəxs məndən başqa 3-4 nəfərin evini də talayıb. Amma mən onu bağışlamağa hazıram.Əgər dəymiş ziyanı ödəsə, bağışlayaram. Hamının evində olduğu kimi bizim də 3-5 manatımız vardı, biraz qızıl-brilyant almışdıq, hamısını aparıb. Qaytarsa cəzası da yəqin daha yüngül olar”.

Qeyd edək ki, Masallı rayon sakini olan N.Əliyevin əməllərindən təkcə Pərvin Lətifov şikayətçi deyil. Xətai rayon sakini Murad Axundov bu ilin iyul ayında evindən 15 min manatlıq qızıl-zinət əşyalarının oğurlanması ilə bağlı polisə müraciət edib. Həmin oğurluq hadisəsinin və Xətai rayonunda törədilmiş bir neçə digər cinayət əməlinin də N.Əliyev tərəfindən törədilməsi müəyyən edilib. Məhkəmə prosesində N.Əliyev özünü təqsirli bilib və törətdiyi əməlləri etiraf edib.