“Azərbaycan vəkili” jurnalının ikinci sayı çıxıb

“Azərbaycan vəkili” jurnalının ikinci sayı işıq üzü görüb. Lent.az-ın məlumatına görə,jurnalda tanınmış hüquqşünaslar və vəkillərin istehlakçı hüquqları, əmək müqaviləsinin xitamı, mənəvi zərərin əvəzinin ödənilməsi və s. məsələlərlə bağlı məqalələri, İnsan Hüquqları üzrə Avropa Məhkəməsinin hakimi Xanlar Hacıyevin “Konstitusional təfsir və fərdi şikayətlər” adlı yazısı, konstitusiya Məhkəməsinin sədri Fərhad Abdullayevin müsahibəsi toplanıb.

Jurnalda, həmçinin Konstitusiya Məhkəməsi və Avropa Məhkəməsinin qəbul etdiyi maraqlı qərarlar, ötən rüb ərzində Azərbaycan qanunvericiliyində baş vermiş mühüm yeniliklər, hüququn müxtəlif sahələri ilə bağlı yerli və beynəlxalq mətbuatda dərc olunmuş maraqlı xəbərlər, tanınmış hüquqşünasların həyat və faəliyyəti haqqında məlumatlar yer alıb.

“Sualınıza vəkil cavab versin” rubrikasında isə Bakı Hüquq Mərkəzinin hüquqşünaslarının müxtəlif hüquqi məsələlərlə bağlı vətəndaşların suallarına cavabları yerləşdirilib.

Qeyd edək ki, Azərbaycan hüquq tarixində ilk dəfə olaraq vəkillik fəaliyyətinə həsr olunmuş nəşr Ədliyyə Nazirliyində rəsmi qeydiyyatdan keçməklə rüblük buraxılmaq üçün nəzərdə tutulub.

Jurnal "Azərbaycan Hüquq İslahatları Mərkəzi" İB-nin təşkilati dəstəyi ilə çıxmaqla Azərbaycanda insan hüquqlarının müdafiəsinə dəstək verəcək, vəkil peşəsinin hüquqşünaslar arasında təbliği ilə onun nüfuzunun artırılması, həmçinin gələcəkdə vəkillik sahəsində mövcud olan aktual problemlərin tədqiqi ilə vəkillik hüququ elminin inkişafına töhfə verəcək.