Şəmkirdə daha bir məktəbli qız ərə verilir: polisə çağırıldılar

Şəmkirdə daha bir məktəbli qızın nikaha daxil olması barədə iddialar yayılıb.

Lent.az xəbər verir ki, bu barədə sosial şəbəkələrdə məlumat paylaşılıb. Həmçinin Azərbaycan Uşaqlar Birliyinin sədri Kəmalə Ağazadə isə məktəbli qıza nişan mərasimi keçirildiyini bildirib.

Onun sözlərinə görə, Şəmkir şəhəri Cahangir Rüstəmov adına məktəbin 11-ci sinfində təhsil alan qızın oktyabrın 15-də nişan mərasimi baş tutub.

Daxili İşlər Nazirliyinin mətbuat xidmətinin Gəncə regional qrupunun baş inspektoru polis kapitanı Eşqin Qasımov Lent.az-a bildirib ki, Şəmkir rayonunda daha bir yetkinlik yaşına çatmayan şıxsin nikaha daxil olması barədə sosial şəbəkələrdə yayılan məlumatlarla bağlı rayon Polis Şöbəsində müvafiq araşdırmalar başlanılıb:
"Belə ki 11-ci sinif şagirdi Ləman Mehtiyevanın (ad soyad şərtidir) nişan mərasimi keçirilməsi barədə məlumata görə, artıq həm qızın həm də qarşı tərəfin valideynləri şöbəyə dəvət olunaraq profilaktiki söhbət aparılıb, bildirilib ki, yetkinlik yaşına çatmayan şəxsin ailə qurması cinayət məsuliyyəti yaradır və bu məsuliyyəti valideynlər daşıyır".

Qeyd edək ki, bu gün Şəmkirdə 14 yaşlı qızın əmisi oğluna ərə verilməsi barədə məlumat vermişdik.