Şəkidə ağır qəza: ölən və yaralananlar var - YENİLƏNİB

Şəkidə baş verən ağır yol qəzasında ölən və yaralananların adları məlum olub.

APA-nın şimal-qərb bürosunun məlumatına görə, qəza zamanı ölən şəxsin “VAZ 21011” markalı avtomobildə sərnişin qismində olan Şəki rayon sakini, 42 yaşlı Şahid Əşrəf oğlu Rüstəmov olması müəyyən edilib.

Yaralılar - Şahid Rüstəmovun həyat yoldaşı, 33 yaşlı Solmaz Qoca oğlu Rüstəmova, onların övladları - 2 yaşlı Elgün Rüstəmov və 5 yaşlı Aliyə Rüstəmova, “VAZ 21011”in sürücüsü Şəki rayon sakini, 37 yaşlı Ramin Sabir oğlu Qocayev və “VAZ 2106” markalı avtomobilin sürücüsü, 54 yaşlı Eldar Adil oğlu Vəlibəyovdur. Onlar Şəki Rayon Mərkəzi Xəstəxanasına yerləşdiriliblər.

***

Saat 10:15

Şəkidə ağır yol nəqliyyat hadisəsi baş verib.

APA-nın şimal-qərb bürosunun məlumatına görə, hadisə bu gün saat 09:30 radələrində Şəki-Oğuz avtomobil yolunda qeydə alınıb. Belə ki, "VAZ 2106" markalı minik avtomobili ilə "VAZ 21011" markalı minik avtomobili toqquşub.

Qəza zamanı bir nəfər hadisə yerində ölüb, ikisi azyaşlı olmaqla dörd nəfər xəsarət alıb.

Hadisə yerinə Fövqaladə Hallar Nazirliyinin Şəki rayon Dövlət Yanğından Mühafizə Hissəsinin xilasediciləri cəlb edilib.