Azərbaycanda ağır qəza: ölənlər var - YENİLƏNİB

Martın 2-də Muğanlı-İsmayıllı avtomobil yolunun İsmayıllı rayonu ərazisində Şöhrət Dünyamalıyevin idarə etdiyi “QAZ-2705” markalı 23-BG-086 dövlət qeydiyyat nişanlı yük avtomobilinin Musa İsmayılzadənin idarə etdiyi “VAZ-21074” markalı 10-EZ-877 dövlət qeydiyyat nişanlı avtomobillə toqquşması nəticəsində sürücü M.İsmayılzadə və sərnişin Rüstəm Əzimovun vəfat etmələri, sürücü Ş.Dünyamalıyev və digər 2 sərnişinin isə xəsarət almaları faktına görə Daxili İşlər Nazirliyinin Baş İstintaq və Təhqiqat İdarəsinə bilavasitə tabe olan Yol-nəqliyyat hadisələrinə dair işlər üzrə İstintaq və Təhqiqat Şöbəsində Cinayət Məcəlləsinin 263.3-cü (yol hərəkəti və nəqliyyat vasitələrinin istismarı qaydalarını pozma ehtiyatsızlıqdan iki və daha çox şəxsin ölümünə səbəb olduqda) maddəsi ilə cinayət işi başlanıb.

Baş Prokurorluğun və Daxili İşlər Nazirliyinin mətbuat xidmətlərindən Lent.az-a verilən məlumata görə, cinayət işi üzrə hadisə yerinə baxış keçirilib, şahidlər dindirilib, zəruri ekspertizalar təyin olunub və digər təxirəsalınmaz istintaq hərəkətləri həyata keçirilib.

Aparılmış istintaqla hadisənin Ş.Dünyamalıyev tərəfindən yol hərəkəti və nəqliyyat vasitələrinin istismarı qaydalarının kobud surətdə pozularaq törədilməsinə əsaslı şübhələr müəyyən edildiyindən o, martın 2-də şübhəli şəxs qismində tutulub.

Hazırda iş üzrə zəruri istintaq tədbirləri davam etdirilir.

***

14:50

İsmayıllıda baş verən yol qəzasında ölənlərin və yaralananların adları məlum olub.

APA-nın yerli bürosunun xəbərinə görə, yük maşını ilə minik avtomobilinin toqquşması nəticəsində İsmayıllı rayon sakinləri - Səlimov Nadir Ağasəf oğlu və Əzimov Rüstəm Ramiz oğlu dünyasını dəyişib.

İsmayılzadə Musa Əlişir oğlu, Səlimov Nahid Ağasəf oğlu və Şöhrət Dünyamalıyev müxtəlif dərəcəli bədən xəsarətləri ilə xəstəxanaya yerləşdirilib.

***

14:14

İsmayıllı rayonunda ağır yol-nəqliyyat hadisəsi baş verib.

APA-nın yerli bürosunun xəbərinə görə, hadisə bu gün saat 13:00 radələrində İsmayıllı-Muğanlı yolunun Diyallı kəndi ərazisindən keçən hissəsində qeydə alınıb. "Ford Tranzit" markalı, 23-BC-086 dövlət nömrə nişanlı yük maşını "VAZ 2107" markalı, 10-FZ-877 dövlət nömrə nişanlı minik avtomobili ilə toqquşub. Nəticədə 2 nəfər ölüb, 3 nəfər ağır xəsarət alıb.

Yaralılar İsmayıllı rayon Mərkəzi Xəstəxanasına aparılıb.