Azərbaycanda İran vətəndaşı narkotiklə saxlanıldı

Yevlax rayonunda narkotik vasitə gəzdirən İran sakini saxlanılıb.

Daxili İşlər Nazirliyi mətbuat xidmətinin Bərdə regional qrupundan Lent.az-a verilən məlumata görə, daxil olmuş məlumat əsasında Yevlax rayon Polis Şöbəsinin əməkdaşlarının keçirdiyi əməliyyat-axtarış tədbirləri nəticəsində narkotik vasitələri qanunsuz daşımasında şübhəli bilinən İran vətəndaşı Həsən Bozorgi saxlanılaraq Polis Şöbəsinə gətirilib.

Onun üzərinə baxış keçirilən zaman cibindən 1 ədəd sellofan torbaya bükülmüş çəkisi 7,12 qram narkotik vasitə olan tiryək aşkar edilərək götürülüb.

Araşdırmalarla onun sərhədi qanunsuz keçdiyi də müəyyən edilib. Dindirilmə zamanı o törətdiyi cinayət əməlini etiraf edib.

Faktla bağlı Yevlax rayon Polis Şöbəsində araşdırma aparılır.