Moskvada azərbaycanlı din xadimini qətlə yetirənlər tutuldu

Bir müddət öncə Moskvada qətlə yetirilən azərbaycanlı din xadimi Mətin Mehdiyevin qətlinin üstü açılıb. Lent.az-ın Rusiya KİV-ə istinadən verdiyi xəbərə görə, qatillər iki nəfər olublar.

Xatırladaq ki, 33 yaşlı Mətin Mehdiyev aprelin 9-da Moskva şəhəri Brest küçəsi ünvanında, yaşadığı evin qarşısında öldürülüb. İstintaqın gəldiyi nəticəyə görə, Mehdiyev qarət məqsədi ilə öldürülüb. Qatillər onun üstündən “Vertu” markalı bahalı telefon və 50 min rubl (təxminən 1600 dollar) götürüblər.

Araşdırma zamanı o da məlum olub ki, hadisə zamanı qatillər sərxoş olublar. Moskva polisindəki mənbədən “Komsomolskaya pravda”ya verilən xəbərə görə, Mehdiyevi qətlə yetirənlərdən ikisi oğlan, ikisi isə qız olub və hələ ki onlardan yalnız ikisi ələ keçib, iki nəfəri isə axtarılır.

Ələ keçənlər öz ifadələrində Mehdiyevi qarət məqsədi öldürdüklərini iddia ediblər. Onlar əvvəlcə Mətini döyüb pulunu əlindən almağa cəhd ediblər. Amma onun müqavimət göstərdiyini görüb bıçaqla bir neçə zərbə vurublar.

Qəzetin yazdığına görə, günahları sübut ediləcəyi təqdirdə qatilləri ömürlük həbs gözləyir.

Səbuhi