İstirahət mərkəzində atışma

Azərbaycan paytaxtında silahlı insident olub.

Bu barədə APA-ya Daxili İşlər Nazirliyinin mətbuat xidmətindən məlumat verilib.

Hadisə ötən gecə Salyan yolu, 32 ünvanında yerləşən “Min bir gecə” istirahət mərkəzində qeydə alınıb. Adı hələlik açıqlanmayan naməlum şəxs odlu silahdan atəş açaraq Bakı şəhər sakini, 1982-ci il təvəllüdlü Bayramov Ramal Abdulla oğlunu qətlə yetirib, daha bir nəfəri, Şəmkir sakini, 1985-ci il təvəllüdlü Mənsimov Səməd İbadət oğlunu isə yaralayıb.

Baş vermiş hadisə ilə bağlı əməliyyat qrupu yaradılıb və fakta görə Cinayət Məcəlləsinin 120.1-ci (qəsdən adam öldürmə) və 228-ci (qanunsuz olaraq odlu silah gəzdirmə) maddələri ilə cinayət işi başlanıb.

Hazırda hadisəni törədən şəxsin müəyyən edilərək tutulması istiqamətində əməliyyat tədbirləri davam etdirilir.