62 yaşlı kişi dayanacaqda arvadını qanına boyadı

Sentyabrın 21-də Bakıda ər arvadını öldürməyə cəhd edib. Binəqədi rayon Polis İdarəsindən Lent.az-a verilən məlumata görə, 8-ci mikrorayon, C.Xəndan küçəsində 1949-cu il təvəllüdlü Xalıqov Müzəffər Mütəllimoğlu həyat yoldaşı, 1956-cı ildə doğulmuş Xalıqova Nazilə Oruc qızını bıçaqlayıb.

Hadisə şahidlərinin Lent.az-a verdiyi məlumata görə, 62 yaşlı ər həyat yoldaşına avtobus dayanacağında hücum çəkib. N.Xalıqova saat 17.00 radələrində avtobus gözləyərkən əri ona yaxınlaşıb və əlindəki mətbəx bıçağı ilə 55 yaşlı qadının ürəyinə zərbə endirib. Dərhal ətrafdakı şəxslər qəzəblənmiş kişini tutaraq uzaqlaşdırmağa çalışıblar. Qadın isə ağır vəziyyətdə Kliniki Tibbi Mərkəzə aparılıb. Yaralının komada olduğu bildirilir.

Hadisənin hansı zəmində baş verməsi və səbəbləri barədə ətraflı məlumat almaq mümkün olmayıb.

Faktla əlaqədar cinayət işi başlanılıb. M.Xalıqov saxlanılıb.

Nizam RZA