Bakı sakini arvadını və evindəki kişini bıçaqladı

Xəzər rayon Polis İdarəsindən Lent.az-a verilən məlumata görə, Binə qəsəbəsi, H.Hasilov küçəsi 13, mənzil 80-də 1973-cü il təvəllüdlü Bayramova Mehriban Oğul qızı və onun qohumu, 1979-cu ildə anadan olmuş İsmayılov Amil Rəvvaq oğlu bıçaqlanıb. Hər iki şəxs müxtəlif dərəcəli kəsici-deşici xəsarətlərlə 3 saylı Şəhər Xəstəxanasına yerləşdirilib. M.Bayramovanın xəsarətləri arasında döş qəfəsinin sol hissəsində daxilə nüfuz edən yara olduğundan o, reanimasiya şöbəsinə yerləşdirilib.

Sonrakı araşdırmalar nəticəsində məlum olub ki, hər iki şəxsi M.Bayramovanın həyat yoldaşı, 1971-ci il təvəllüdlü Aslanov Nofəl Höccət oğlu bıçaqlayıb. Hadisənin hansı səbəbdən, hansı şəraitdə baş verməsi, həmçinin evdə bıçaqlanan digər şəxs – A.İsmayılovun kimliyi haqda məlumat almaq hələlik mümkün olmayıb.

Faktla əlaqədar cinayət işi başlanılıb, araşdırma aparılır.

Nizam RZA