Masallıda namus üstündə qan töküldü

Mayın 4-də saat 16:00 radələrində Masallı rayonunda bıçaqlanma hadisəsi baş verib. Rayon Polis Şöbəsindən Lent.az-a verilən məlumata görə, Qodman kənd sakini 1980-ci il təvəllüdlü İrşad Mürşüdov öz əmisi qızı 1980-ci ildə anadan olmuş Mürşüdova Ətirə Müqəddəs qızını bıçaqlayıb. Ə.Mürşüdova çoxlu qan itirmiş halda, ağır vəziyyətdə Masallı şəhər xəstəxanasının reanimasiya şöbəsinə yerləşdirilib. Həkimlər vəziyyəti kritik olan qadının həyatını xilas etməyə çalışırlar.

Masallı RPŞ əməkdaşlarının həyata keçirdikləri əməliyyat-axtarış tədbirləri nəticəsində hadisəni törətmiş 31 yaşlı İrşad Mürşüdov saxlanılıb. O, ilkin dindirilmə zamanı əmisi qızını namus üstündə bıçaqladığını bildirib. Ə.Mürşüdovanın vəziyyəti ağır olduğundan onu dindirmək hələlik mümkün olmayıb. Hadisənin hansı şəraitdə və hansı səbəbdən baş verməsi araşdırılır.

Qeyd edək ki, bıçaqlanan qadın 4 uşaq anasıdır. 2001-ci ildə rayonun Allahyarlı kəndinə gəlin köçən qadın 8 il sonra həyat yoldaşından ayrılıb və 4 azyaşlı övladı ilə doğma kəndinə qayıdıb.

Nizam RZA