“Texnikabank”ın həbsdən azad edilən sabiq rəhbəri danışdı

“Düşünürəm ki, daxil olan informasiyalar araşdırılmalı idi. Bu mənada hüquq-mühafizə orqanlarının addımlarını haqlı sayıram”. Lent.az-ın məlumatına görə, bunu “Qafqazinfo”ya açıqlamasında bu gün həbsdən azad olunan tanınmış iş adamı, “Texnikabank”ın sabiq rəhbəri Etibar Əliyev deyib.

Sabiq bank rəhbəri qeyd edib ki, azadlığa buraxılması üçün həm müvafiq strukturlara, həm də dövlət rəhbərliyinə təşəkkürünü bildirir. O öz həbsini və azadlığa buraxılmasını qısaca belə şərh edib: “Hər hansı daxil olmuş informasiyanın araşdırılması 1 ay da, 9 ay da çəkə bilər. Düşünürəm ki, əsas nəticədir. Mənimlə bağlı daxil olan məlumatların da yoxlanılması bu qədər çəkdi və mən bu gün evimdəyəm. Obyektiv münasibətə görə hər kəsə minnətdaram”.

Qeyd edək ki, E. Əliyev Milli Təhlükəsizlik Nazirliyinin əməkdaşları tərəfindən keçirilən əməliyyat tədbirləri nəticəsində bu ilin mart ayında həbs olunmuşdu.