Ağcabədidə qırğın: 1 gündə 4 ölü, 6 yaralı

Noyabrın 14-də Ağcabədi rayonunda daha bir dəhşətli yol-nəqliyyat hadisəsi baş verib. Rayon Polis Şöbəsindən Lent.az-a verilən məlumata görə, Avşar kəndi ərazisində Şükür Şükürovun idarə etdiyi “VAZ 21 011”, Bakir Hüseynovun idarə etdiyi “VAZ 21 099” və Novruz Kərimovun sürdüyü “VAZ 21 099” toqquşub. Nəticədə B.Hüseynov və Ş.Şükürovun sərnişini Rövşən Quliyev hadisə yerində ölüb. B.Hüseynovun həyat yoldaşı Sədaqət, oğlu Emin, həmçinin digər iki sürücü ağır vəziyyətdə xəstəxanaya yerləşdirilib.

Qeyd edək ki, qəza nəticəsində ölən və yaralananların hamısı məcburi köçkünlərdir.

Onu da qeyd edək ki, bu hadisə noyabrın 14-də Ağcabədidə baş vermiş ikinci dəhşətli yol-nəqliyyat hadisəsidir. Ayın 14-ü saat 01 radələrində Ağdam-Ağcabədi yolunun 7-ci kilometrliyində 1987-ci il təvəllüdlü Muradov Sahib İnqilab oğlunun idarə etdiyi “VAZ 21015” markalı avtomobil yoldan çıxaraq ağaca çırpılması nəticəsində 2 nəfər ölmüş, daha 2 nəfər isə yaralanmışdı.

Qəzalar nəticəsində ölənlərin meyitləri və yaralılar Ağcabədi rayon Mərkəzi Xəstəxanasına yerləşdirilib.

Nizam RZA